Свята спорту і выдатнага настрою аб'яднала больш за 200 удзельнікаў: супрацоўнікаў, выкладчыкаў, студэнтаў універсітэта, а таксама навучэнцаў каледжаў ГрДУ імя Янкі Купалы.

З прывітальным словам да ўдзельнікаў спаборніцтваў звярнуўся першы прарэктар Купалаўскага ўніверсітэта Аляксандр Карэўскі:

- Леў Талсты казаў: "Трэба абавязкова падтрасаць сябе фізічна, каб быць здаровым маральна". Залатыя словы, я цалкам іх падзяляю. Давайце знаходзіць час для такіх мерапрыемстваў! Жадаю вам правесці сённяшні дзень весела і забіяцка, прыняць удзел ва ўсіх спаборніцтвах.

Пасля ўрачыстай цырымоніі адкрыцця і размінкі каманды пачалі спаборніцтвы. Галоўнай асаблівасцю фестывалю стала здача нарматываў Дзяржаўнага фізкультурна-аздараўленчага комплекса Рэспублікі Беларусь. Купалаўцы дэманстравалі цягавітасць, хуткасць і каардынацыю ў самых розных дысцыплінах: ад класічнага чаўночнага бега, скачкоў у даўжыню і падцягванняў да валейбольных і футбольных конкурсаў, скандынаўскай хадзьбы, бачэ і кручэння хула-хупа.

Віншуем усіх удзельнікаў свята з цудоўнымі вынікамі! Вы ў чарговы раз даказалі, што купалаўцы - гэта сінонім здароўя, энергіі і поспеху!