На працягу года Гродна насіў статус маладзёжнай сталіцы нашай краіны. За гэты час было рэалізавана нямала значных праектаў, і моладзь атрымала новыя магчымасці для развіцця і рэалізацыі свайго патэнцыялу. Купалаўскі ўніверсітэт адыграў важную ролю ў правядзенні ўрачыстых мерапрыемстваў, якія азнаменавалі атрыманне горадам над Нёманам ганаровага статусу.Як гаворыцца, час ляціць незаўважна, зараз статус маладзёжнай сталіцы пераходзіць да Віцебска! Сёння там разгорнуцца маштабныя ўрачыстасці, у якіх прыме ўдзел дэлегацыя нашага ўніверсітэта.
Удзельнікаў урачыстасці чакае шмат цікавых падзей. Сярод іх круглы стол "Навука і адукацыя", дыялогавыя пляцоўкі, выстаўка-прэзентацыя "Віцебск - горад магчымасцяў для моладзі" і ўрачыстая цырымонія перадачы эстафеты маладзёжнай сталіцы.
Важнай часткай гэтага дня будзе ўскладанне кветак да мемарыяльнага комплексу ў гонар савецкіх воінаў, партызан і падпольшчыкаў Віцебшчыны. Акрамя таго, дэлегаты наведаюць Нацыянальны акадэмічны драматычны тэатр імя Якуба Коласа, дзе паглядзяць спектакль на беларускай мове, а на экскурсіі пазнаёмяцца з гісторыяй віцебскага краю. Усяго ў свяце прымуць удзел больш за 450 студэнтаў, маладых вучоных, каардынатараў валанцёрскіх праектаў.
Даведка
Маладзёжная сталіца - гэта статус, які прысуджаецца гораду тэрмінам на адзін год, на працягу якога ён атрымлівае магчымасць прадэманстраваць сваю прыхільнасць сучаснай маладзёжнай культуры, лепшыя практыкі па развіццю сацыяльнай, эканамічнай, палітычнай актыўнасці моладзі.
