Тэлемост прысвечаны адной з найважнейшых задач – захаванню гістарычнай памяці. Каардынатарам мерапрыемства выступіў загадчык кафедры гісторыі Беларусі, археалогіі і спецыяльных гістарычных дысцыплін, кандыдат гістарычных навук Сяргей Амелька. З прывітальным словам да ўдзельнікаў звярнулася прарэктар па навуковай рабоце Купалаўскага ўніверсітэта Наталля Башун.

– Перамога 1945 года стала найвялікшым подзвігам нашага народа. Мільёны жыццяў былі аддадзены за свабоду і незалежнасць Радзімы, за вызваленне Еўропы ад нацызму. І сёння, калі з кожным годам усё менш застаецца жывых сведкаў вайны, мы абавязаны зберагчы праўду пра тыя падзеі. Гістарычная памяць фарміруе наш светапогляд, умацоўвае нацыянальную ідэнтычнасць, выхоўвае пачуццё патрыятызму і грамадзянскай адказнасці. Менавіта яна звязвае пакаленні, дапамагаючы нам усведамляць каштоўнасць міру, незалежнасці і культурнай спадчыны, – адзначыла прарэктар па навуковай рабоце Наталля Башун.

На тэлемосце ўдзельнікі падалі свае даклады з актуальнымі праблемамі, звязанымі з распаўсюджваннем ідэй неанацызму. Былі закрануты пытанні Вялікай Айчыннай вайны і праблемы скажэння гістарычнай праўды.

З дакладам на тэму «Палітыка-прававыя аспекты аб Вялікай Айчыннай вайне ў Беларусі» выступіў доктар гістарычных навук, прафесар кафедры гісторыі Беларусі, археалогіі і спецыяльных гістарычных дысцыплін Эдмунд Ярмусік, разгледзеўшы палітыку і права ў кантэксце Вялікай Айчыннай вайны. Студэнт чацвёртага курса факультэта гісторыі, камунікацыі і турызму Максім Козіч прадставіў даклад на тэму «Удзельнікі Вялікай Айчыннай вайны – ветэраны пажарнай службы Беларус», падкрэсліўшы ўклад ветэранаў пажарнай службы ў Перамогу. З дакладам «Інтэрнацыянальны характар ​​барацьбы супраць нямецкіх акупантаў на тэрыторыі Беларусі» выступіў магістрант першага курса факультэта гісторыі, камунікацыі і турызму Дзмітрый Богдан, адзначыўшы ролю прадстаўнікоў розных нацыянальнасцей у барацьбе з акупантамі.

На заканчэнне тэлемоста ўдзельнікі правялі дыскусію і падвялі вынікі сустрэчы.