15 ліпеня абітурыенты, якія асвоілі факультатывы «У свеце тэхнікі і тэхналогій: выбіраем інжынерную прафесію» і «Уводзіны ў педагагічную прафесію», прайшлі гутаркі ў Купалаўскім універсітэце.У гэты адказны дзень 15 будучых студэнтаў прадэманстравалі свае веды і захапленне выбраным напрамкам. Шэсць з іх – выпускнікі класаў інжынернай накіраванасці, восем – педагагічнай. Адзін абітурыент мае рэкамендацыю наглядальнай рады ўстановы адукацыі «Нацыянальны дзіцячы тэхнапарк».
Перад пачаткам сумоўяў хлопчыкаў і дзяўчынак павіталі рэктар Гродзенскага дзяржаўнага ўніверсітэта імя Янкі Купалы Ірына Кітурка і першы прарэктар Аляксандр Карэўскі.
Ірына Фёдараўна пажадала абітурыентам поспехаў і адзначыла, што чакае кожнага з іх у ліку студэнтаў Купалаўскага ўніверсітэта.
– Гутарка ўключала ў сябе пытанні па праграме факультатываў адпаведнага профілю. Усе гэтыя пытанні абітурыенты вывучалі ў школах. Таксама мы запрашалі іх да сябе і актыўна ўдзельнічалі ў рэалізацыі праграмы факультатываў праз правядзенне заняткаў, – адзначыў першы прарэктар Гродзенскага дзяржаўнага ўніверсітэта імя Янкі Купалы Аляксандр Карэўскі.
Вынікі выпрабавання сталі вядомыя абітурыентам адразу пасля завяршэння сумоўяў з усімі выпускнікамі профільных класаў, якія падалі дакументы ў Купалаўскі ўніверсітэт. Гэты дзень стаў важным крокам на шляху да будучай прафесіі для мэтанакіраваных маладых людзей, гатовых унесці свой уклад у развіццё адукацыі і тэхналогій.
