Адкрываючы сустрэчу, ганаровы госць прэзентацыі, намеснік старшыні Гродзенскага абласнога аддзялення Саюза пісьменнікаў Беларусі Дзмітрый Радзіёнчык зазначыў: «Пацешуся разам з вамі таму, што ў нас ёсць такая яскравая творчая асоба. За яе дзейнасцю наша пісьменніцкая арганізацыя сочыць ужо не адзін год. Наталля актыўна ўдзельнічае ў творчым жыцці Прынёманскага краю». Дзмітрый Мікалаевіч падкрэсліў, што кожная творчая асоба мае патрэбу ў падтрымцы і падзякаваў аўдыторыі за ўвагу да творчасці маладых пісьменнікаў.

Член Гродзенскага абласнога аддзялення Саюза пісьменнікаў Беларусі Вольга Алізар звярнула ўвагу на тое, што Наталля Лабеева – выключна творчы чалавек, паэтычная і ранімая натура. Госця павіншавала маладога аўтара з прэзентацыяй і пажадала творчых поспехаў.

Падчас прэзентацыі Наталля Лабеева расказала аб тым, што нарадзілася ў Слоніме. Першыя казкі пачала складаць ва ўзросце 6 гадоў. У яе ўжо выйшлі 6 першых кніг, і зараз аўтар паставіла перад сабою задачу расказаць пра сваю творчасць свету.

Аповесць «Дзённік мастоміса або Жыццё вачыма пацуковай мышкі» не толькі пра маленькую хатнюю жывёлу. Апавяданне будуецца ад асобы грызуна. І аўтар перыядычна дае пераклад: як тыя ці іншыя акалічнасці бачаць людзі. Таму кніга вучыць таму, як важна навучыцца бачыць свет не толькі на свае, але і чужыя вочы. Гэтая кніга пра ўзаемаадносіны маці і дачкі, начальніцы і падпарадкаванага, суседзяў. А паколькі кніга пра ўзаемаадносіны, яна будзе цікавая людзям маладым. Тым, хто вучыцца выбудоўваць камунікацыю адно з адным.

Прысутныя на сустрэчы студэнты задалі пытанні Наталлі аб творчым працэсе: удакладнілі, ці ёсць у аўтара творчы план да таго, як з'явяцца першыя радкі, што з'яўляецца падставай для натхнення, адкуль аўтар чэрпае вобразы, ці ёсць у Наталлі публікацыі ў перыядычным друку.

Завяршылася прэзентацыя аўтограф-сесіяй, падчас якой студэнты-купалаўцы атрымалі экзэмпляры аповесці з аўтографамі і пажаданнямі аўтара.