Намеснік Прэм'ер-міністра Рэспублікі Беларусь Віктар Каранкевіч уручыў дыплом лаўрэата рэктару ўніверсітэта Ірыне Кітурка і начальніку аддзела менеджменту якасці Сяргею Шчарбініну.

– Конкурс стаў 26-ым па ліку і прадэманстраваў шырокую ўцягнутасць розных галін эканомікі і бізнесу ў працэс павышэння якасці сваёй работы, – адзначыў намеснік Прэм'ер-міністра Рэспублікі Беларусь Віктар Каранкевіч.

Прэмія з'яўляецца аўтарытэтным праектам конкурснага руху за якасць у Беларусі. Гэты праект дае магчымасць выдзяляць сярод беларускіх арганізацый лідараў, якія выбудоўваюць сваё развіццё на аснове якасці, і адзначае іх заслугі на дзяржаўным узроўні.

Заслужаныя ўзнагароды за дасягненне значных вынікаў у галіне якасці прадукцыі, паслуг або работ уручаны 40 арганізацыям. З іх 14 сталі лаўрэатамі Прэміі, 14 – пацвердзілі званне лаўрэата паўторна. 12 арганізацый прызнаны дыпламантамі конкурсу. Тры арганізацыі ўдастоены спецыяльных узнагарод.

У час узнагароджання былі ўручаны дыпломы пераможцам конкурсу «Лепшая дыпломная і навукова-даследчая работа студэнтаў у галіне менеджменту і кантролю якасці» 2024 года. Узнагароды былі атрыманы ад першага намесніка Міністра адукацыі Аляксандра Бахановіча. Дыпломамі ўзнагароджаны навуковы кіраўнік выпускніка фізіка-тэхнічнага факультэта, загадчык кафедры электратэхнікі і электронікі Андрэй Герман, а таксама Вікторыя Брыль і Анастасія Ляўковіч, выпускнікі факультэта гісторыі, камунікацыі і турызму і іх навуковы кіраўнік, старшы выкладчык кафедры турызму і культурнай спадчыны Ірына Скварнюк.

У рамках цырымоніі таксама прайшла выстава, на якой былі прадстаўлены значныя вынікі Купалаўскага ўніверсітэта.

Нагадаем, Гродзенскі дзяржаўны ўніверсітэт імя Янкі Купалы быў упершыню ўдастоены Прэміі Ўрада Рэспублікі Беларусь за дасягненні ў галіне якасці ў 2010 годзе, затым у 2015, 2018 і 2021 – пацвердзіў званне лаўрэата гэтага конкурсу.