З 18 па 20 мая ў Гомельскім дзяржаўным універсітэце імя Францыска Скарыны праходзіць IV Рэспубліканскі форум маладых вучоных устаноў вышэйшай адукацыі з міжнародным удзелам, які сабраў больш за 300 удзельнікаў з чатырох краін. У гэтым значным мерапрыемстве бяруць удзел студэнты, магістранты, аспіранты і прафесарска-выкладчыцкі склад, уключаючы прадстаўнікоў ВНУ Беларусі, Расіі, Узбекістана і Кыргызстана.
У складзе дэлегацыі ГрДУ імя Янкі Купалы - старшыня Савета маладых вучоных, кандыдат гістарычных навук, дацэнт кафедры гісторыі Беларусі, археалогіі і спецыяльных гістарычных дысцыплін Аляксандр Горны, дацэнт агульнавайсковай кафедры ваеннага факультэта, кандыдат гістарычных навук Аляксандр Хаванскі і старшы выкладчык кафедры грамадзянскага права і працэсу, кандыдат юрыдычных навук Барыс Балахонаў.
20 мая форум прадоўжыўся Міжнароднай навукова-практычнай канферэнцыяй, у рамках якой запланавана работа ў пяці тэматычных секцыях. Тэмы абмеркаванняў ахопліваюць актуальныя праблемы і напрамкі развіцця тэхнічных і фізіка-матэматычных навук, перспектывы эканамічнага развіцця, выклікі адукацыі, а таксама пытанні гарантавання нацыянальнай бяспекі Беларусі.
З дакладам «Ахоўны ордэр як мера абароны ахвяраў хатняга гвалту: перспектыва для прававой сістэмы Беларусі» выступіў Барыс Балахонаў, які падзяліўся сваімі поглядамі на паляпшэнне прававой абароны ў гэтай галіне. Таксама дацэнт Аляксандр Хаванскі прадставіў даклад на тэму "Савецкае ваеннае будаўніцтва на тэрыторыі Беларусі ў 1917-1918 гг.", у якім разгледзеў гістарычныя аспекты ваеннага будаўніцтва ў гэты перыяд.
Удзел маладых вучоных ГрДУ імя Янкі Купалы ў форуме падкрэслівае актыўную пазіцыю ўніверсітэта ў галіне навукі і адукацыі, а таксама імкненне да навуковага супрацоўніцтва.
Гродзенскі дзяржаўны ўніверсітэт імя Янкі Купалы