З 4 па 7 мая Гродзенскі дзяржаўны ўніверсітэт імя Янкі Купалы стаў пляцоўкай для правядзення Міжнароднага грамадзянска-патрыятычнага марафону «Час выбраў нас!». Гэтая маштабная падзея, якая аб'яднала энергію маладосці і адданасць гістарычнай памяці, з'яўляецца візітнай картачнай купалаўцаў.
Свой летапіс праект пачаў пісаць у маі 2015 года, зарадзіўшыся як студэнцкая ініцыятыва, прымеркаваная да юбілейнай даты вялікага подзвігу народа. За мінулае дзесяцігоддзе марафон трансфармаваўся і выйшаў на міжнародны ўзровень. У 2026 годзе ўдзельнікамі сталі 21 каманда з Рэспублікі Беларусь і Расійскай Федэрацыі.
Рабяты змагаліся ў інтэлектуальных бітвах, дэманструючы эрудыцыю, і раскрывалі свае таленты ў творчых намінацыях. Пранізлівыя вакальныя і тэатральныя кампазіцыі, прысвечаныя гераічным старонкам гісторыі і 85-годдзю пачатку Вялікай Айчыннай вайны, не пакінулі абыякавым ніводнага гледача. Адмысловае месца заняла тэма пераемнасці традыцый: канкурсанты не толькі прэзентавалі свае навучальныя ўстановы, але і спаборнічалі ў спрадвечным майстэрстве – выпечцы хлеба і стварэнні вырабаў з дрэва, падкрэсліваючы святасць сямейнага агменю.
Сучасныя выклікі знайшлі адлюстраванне ў ваенна-прыкладным блоку, дзе моладзь дэманстравала навыкі ў тактычнай стральбе і кіраванні беспілотнымі апаратамі, а ўніверсітэцкі стадыён аб'яднаў прыхільнікаў здаровага ладу жыцця ў камандных эстафетах і гульнях.
Сёння, напярэдадні Дня Перамогі, адбыліся фінальныя мерапрыемствы марафона. Урачысты мітынг і ўскладанне кветак да Брацкай магілы савецкіх воінаў і партызан у парку Жылібера сабралі прадстаўнікоў улады, супрацоўнікаў універсітэта, студэнцкую супольнасць і навучэнцаў. Мабыць, самым эмацыйным момантам стала ўрачыстае шэсце да стадыёна «Нёман». Удзельнікі марафона з гонарам пранеслі партрэты сваіх продкаў-герояў.
Фінальнае свята на галоўнай спартыўнай арэне горада, якое ўключыла ў сябе эстафеты «Здаровы я – здаровая краіна» і «Да абароны Айчыны гатовы», а таксама ўшаноўванне пераможцаў, стала яркім акордам гэтага чатырохдзённага марафону. На адкрыцці мерапрыемства ад імя рэктара Гродзенскага дзяржаўнага ўніверсітэта імя Янкі Купалы Ірыны Кітурка выступіў першы прарэктар Аляксандр Карэўскі.
– Мы шчыра вітаем усіх вас у нашай вялікай купалаўскай сям'і. Яна стала багацейшай, дружнейшай, аб'яднаўшы дваццаць адну каманду ўдзельнікаў з універсітэтаў і каледжаў Беларусі і Расіі. Галоўная тэма марафону – патрыятызм і памяць, – адзначыў Аляксандр Яўгеньевіч. – Сёння час выбраў вас! Маладых, тых, каму і далей трэба несці памяць аб нашых героях, якія падарылі нам Вялікую Перамогу!
Па выніках марафону гран-пры сярод вышэйшых навучальных устаноў атрымаў Гродзенскі дзяржаўны ўніверсітэт імя Янкі Купалы. Першае месца заняла каманда Віцебскага дзяржаўнага тэхналагічнага ўніверсітэта. Другое – каманда Віцебскага дзяржаўнага Ордэна Дружбы народаў медыцынскага ўніверсітэта. Трэцяе месца падзялілі каманды Гродзенскага дзяржаўнага медыцынскага ўніверсітэта і Беларускага дзяржаўнага ўніверсітэта.
Сярод устаноў прафесійна-тэхнічнай і сярэдняй спецыяльнай адукацыі гран-пры ўзяла каманда Віцебскага дзяржаўнага тэхнічнага каледжа. Першае месца заваявала каманда Гродзенскага дзяржаўнага электратэхнічнага каледжа імя Івана Шчаснага. Другое месца заняла каманда Мінскага дзяржаўнага каледжа чыгуначнага транспарту імя Я.П. Юшкевіча. На трэцім месцы – каманда Пінскага аграрна-тэхнічнага каледжа імя А.Я. Кляшчова.
Міжнародны грамадзянска-патрыятычны марафон «Час выбраў нас!» у чарговы раз даказаў, што памяць аб вялікай спадчыне з'яўляецца падмуркам, на якім будуецца моцная і квітнеючая будучыня, а ўдзел у такіх праектах дазваляе кожнаму маладому чалавеку адчуць дачыненне да лёсу сваёй Радзімы.
Гродзенскі дзяржаўны ўніверсітэт імя Янкі Купалы