Сёння, 12 мая, на інжынерным факультэце Купалаўскага ўніверсітэта адбылася знакавая падзея – урачыстае адкрыццё сумеснай вучэбнай лабараторыі «Сістэмны аналіз і лагістыка». Праект рэалізаваны сумесна з кампаніяй AXELOT – вядучым распрацоўшчыкам праграмнага забеспячэння для аўтаматызацыі працэсаў кіравання ланцугамі паставак.
Гэта першая навучальная лабараторыя такога профілю ў Рэспубліцы Беларусь. Яе адкрыццё стала вынікам планамернага супрацоўніцтва: дамова паміж універсітэтам і AXELOT была падпісана ў кастрычніку 2024 года, пасля чаго выкладчыкі кафедры лагістыкі і метадаў кіравання прайшлі стажыроўку ў кампаніі і ўжо ў пачатку 2025 года інтэгравалі атрыманы вопыт у навучальны працэс.
Вітаючы гасцей, прарэктар па навуковай рабоце ГрДУ імя Янкі Купалы Наталля Башун падкрэсліла маштаб падзеі:
– Ад імя рэктара ўніверсітэта Ірыны Фёдараўны Кітуркі і ад усіх купалаўцаў я хачу павіншаваць нас усіх і кожнага паасобку з гэтай падзеяй – адкрыццём навучальнай лабараторыі «Сістэмны аналіз і лагістыка». Хочацца сказаць, што гэта значная падзея не толькі для кафедры і факультэта, але і для ўсяго Гродзенскага дзяржаўнага ўніверсітэта імя Янкі Купалы і нават для Гродзенскага рэгіёну, – адзначыла Наталля Зігмунтаўна. – Мы ўсе разумеем, што гэта магчымасць наладжвання сувязяў паміж установай вышэйшай адукацыі і прадстаўнікамі рэальнага сектара эканомікі.
Дэкан інжынернага факультэта Дзмітрый Ліннік адзначыў важнасць асабістага візіту прадстаўніка кампаніі - кіраўніка групы па развіцці адукацыйных праектаў AXELOT Анастасіі Астаф'евай. На сённяшні дзень кампанія адкрыла ўжо 36 лабараторый у Расіі, Беларусі, Узбекістане, Кыргызстане і Казахстане, і з'яўленне такой пляцоўкі ў Гродне - пацвярджэнне высокага статусу ўніверсітэта.
Новая лабараторыя аснашчана сучаснай тэхнікай і інфармацыйнымі стэндамі. Тут студэнты-купалаўцы змогуць апускацца ў рэальныя задачы сістэмнага аналізу; асвойваць актуальныя інструменты аўтаматызацыі лагістыкі; працаваць з прафесійнымі сцэнарыямі, максімальна набліжанымі да запытаў сучаснага рынку.
Адкрыццё лабараторыі супала з цырымоніяй узнагароджання купалаўцаў, якія ўжо даказваюць высокі ўзровень падрыхтоўкі на міжнароднай арэне.
Дыпломы і падарункі за перамогу ў IV Міжнародным конкурсе навукова-даследчых работ па лагістыцы ўручылі камандзе ў складзе Паліны Фронскай, Ганны Жук і Веранікі Копаць за даследаванне інфармацыйных крыніц у галіне цыфравізацыі.
Таксама дыпломамі былі адзначаны прызёры XI Міжнароднай алімпіяды па лагістыцы, якія занялі трэцяе месца: Ілона Кулік, Ксенія Ясюкевіч, Дамініка Алецкая, Арына Цыдзік і Аліна Пашак. Асаблівую падзяку за кіраўніцтва камандамі выказалі загадчыку кафедры лагістыкі і метадаў кіравання, доктару фізіка-матэматычных навук Вадзіму Хартоўскаму.
Гродзенскі дзяржаўны ўніверсітэт імя Янкі Купалы