Урачыстае ўшаноўванне ў гонар 70-годдзя Ільі Барысавіча прайшло 23 чэрвеня ў актавай зале галоўнага корпуса Гродзенскага дзяржаўнага ўніверсітэта імя Янкі Купалы.
Мерапрыемства прайшло з удзелам кіраўніцтва ўніверсітэта і факультэта біялогіі і экалогіі, калег і вучняў ганаровага юбіляра.
Пачала марафон віншаванняў рэктар ГрДУ імя Янкі Купалы Ірына Кітурка. У сваёй прамове яна адзначыла шматграннасць асобы прафесара:
– У Ільі Барысавіча вельмі шмат удзячных вучняў не толькі ў Рэспубліцы Беларусь, але і за мяжой. Ён падрыхтаваў кандыдатаў навук, стаў стваральнікам школы біяхіміі ў нашым універсітэце, за якую Ілью Барысавічу вялікі дзякуй. Ведаю, што да прафесара ідуць не толькі за навуковай радай, але яшчэ і за мудрасцю, цеплынёй і душэўным спакоем, якія Ілья Барысавіч шчодра дорыць кожнаму. Імя Ільі Барысавіча займае верхнія радкі ў нашым рэйтынгу «Выкладчык вачыма студэнтаў». Студэнты і магістранты адзначаюць яго высокі прафесіяналізм, і гэта пацверджана сёння прадстаўнікамі вялікай колькасці навуковых, адукацыйных і іншых устаноў, з якімі прафесар супрацоўнічае ў навуковай сферы. Гэта пацверджана і высокарэйтынгавымі навуковымі публікацыямі, індэкс цытавання якіх вельмі высокі. Гэта ўсё – пра аднаго чалавека.
Да віншавання далучыліся прарэктары Купалаўскага ўніверсітэта, а таксама дэкан факультэта біялогіі і экалогіі.
– Факультэт біялогіі і экалогіі нельга ўявіць без Ільі Барысавіча Заводніка. За гады сваёй працы тут ён унёс і ўносіць неацэнны ўклад не толькі ў яго развіццё, але і ў выхаванне будучых біёлагаў, – адзначыла Вольга Янчурэвіч.
Са шчырымі пажаданнямі да юбіляра звярнуліся прадстаўнікі Інстытута біяхіміі біялагічна актыўных злучэнняў НАН Беларусі, дзе Ілья Барысавіч працуе ў якасці галоўнага навуковага супрацоўніка і члена рэдкалегіі навуковага часопіса інстытута.
>Эмацыйнымі былі віншаванні ад прафесарска-выкладчыцкага складу Гродзенскага дзяржаўнага медыцынскага ўніверсітэта, для якога юбіляр стаў аўтарытэтам і блізкім таварышам.
Асабліва кранальныя словы віншавання гучалі ад самых блізкіх – сяброў, калег, а таксама студэнтаў, якіх Ілья Барысавіч нястомна ўводзіць у неверагодны свет біялогіі і біяхіміі.
Завяршылася мерапрыемства агульным фатаграфаваннем.
Даведачна: Ілья Барысавіч Заваднік нарадзіўся ў 1956 годзе. У 1977 годзе з адзнакай скончыў Гродзенскі дзяржаўны педагагічны інстытут імя Янкі Купалы, а ў 2006 годзе быў абраны на пасаду загадчыка кафедры біяхіміі Купалаўскага ўніверсітэта. Навуковыя даследаванні, якія праводзіліся Ільём Барысавічам, падтрымліваліся грантамі Міжнароднага і Еўрапейскага навуковых фондаў, Фонду імя І. Мяноўскага, Даследчага Фонду НАТА. Вынікі яго даследаванняў апублікаваны больш як у 350 навуковых друкаваных работах і ў трох замежных манаграфіях. Таксама ён з'яўляецца аўтарам навучальных дапаможнікаў па сучасных абласцях біяфізікі і біяхіміі.
Гродзенскі дзяржаўны ўніверсітэт імя Янкі Купалы