На кафедры журналістыкі факультэта гісторыі, камунікацыі і турызму адбыўся трэці выпуск магістраў з Кітайскай Народнай Рэспублікі. Сёння 11 купалаўцаў афіцыйна завяршылі навучанне па спецыяльнасці «Журналістыка» з прафілізацыяй «Медыямэнэджмент». Сем з іх пацвердзілі высокі ўзровень ведаў і атрымалі заслужаныя дыпломы з адзнакай. Гэты ўрачысты дзень стаў яркім завяршэннем важнага этапа ў іх прафесійным станаўленні.
З заваяваннем новай акадэмічнай вяршыні выпускнікоў павіншаваў дэкан факультэта гісторыі, камунікацыі і турызму Віктар Белазаровіч:
– Сёння знамянальны дзень, і я хачу ад імя ўсяго прафесарска-выкладчыцкага складу і студэнтаў нашага ўніверсітэта павіншаваць вас з гэтым святам. Мінуў цэлы год вучобы ў Беларусі. Вы не проста тут жылі – вы асвойвалі новыя кампетэнцыі, спасцігалі тонкасці журналістыкі, сябравалі з нашымі студэнтамі, жылі нашым жыццём, а мы дапамагалі вам і жылі вашымі інтарэсамі. Год праляцеў незаўважна. Сёння вы атрымліваеце дыпломы магістраў, якія пацвярджаюць, што перад намі спецыялісты. І я спадзяюся, што веды, здабытыя ў Купалаўскім універсітэце, дапамогуць вам паспяхова рэалізаваць сябе ў роднай Кітайскай Народнай Рэспубліцы. Хай цеплыня і дабрыня, якія сагравалі вас у Беларусі, назаўжды застануцца ў вашых сэрцах. А гэты год няхай стане важным стартам для будучай кар'еры. У добры шлях, паважаныя выпускнікі!
Асабліва кранальнымі былі словы выкладчыкаў – тых, хто штодня дзяліўся вопытам, дапамагаў расці прафесійна і пашыраў гарызонты магчымасцяў студэнтаў. Са шчырымі пажаданнямі выступіла загадчык кафедры журналістыкі Іна Мінчук:
– Сёння выдатны дзень. Свята для нас, для вас і для вашых бацькоў. Атрыманне дыплома Купалаўскага ўніверсітэта – гэта важны крок, які зменіць ваша жыццё. Я хачу пажадаць вам тры галоўныя рэчы. Першае: любіце сваю прафесію і будзьце сапраўднымі журналістамі. Другое: любіце сваю Радзіму. І трэцяе: не забывайцеся пра Беларусь, якая стала для вас другім домам. Будзьце шчаслівыя!
Дацэнт кафедры журналістыкі Анастасія Зязюлевіч дадала, што ў Купалаўскім універсітэце не прынята адпускаць выпускнікоў без падарункаў. Таму кожны магістр атрымаў персанальнае віншаванне ад свайго навуковага кіраўніка. У гэтых пасланнях гучалі не толькі шчырыя пажаданні і мудрыя навучанні, але і тонка адзначаліся ўнікальныя рысы характару кожнага выпускніка, а таксама яркія думкі, звязаныя з яго навуковымі інтарэсамі.
Што ж думаюць самі магістры пра сваё навучанне ў Гродзенскім дзяржаўным універсітэце?
– Я лічу, што Гарадзенскі дзяржаўны ўніверсітэт імя Янкі Купалы – выдатны выбар для мяне. Я вучыўся і атрымліваў асалоду ад кожным момантам, праведзеным тут. Усе выкладчыкі былі вельмі добрыя і прыязныя. У гэтым універсітэце я змог пашырыць свой кругагляд і пазнаёміцца з зусім іншым ладам жыцця. Мне сапраўды спадабаўся гэты год, – з радасцю падзяліўся сваімі эмоцыямі Чэнь Іхань.
Святочны настрой падтрымала і Сюй Юфан:
– Для мяне вялікі гонар і радасць вучыцца ў Гродне. Усе мае выкладчыкі вельмі прафесійныя і ўважлівыя да нас. Я спадзяюся, што ў мяне будзе магчымасць стаць такім самым універсітэцкім прафесарам, як яны!
Наперадзе выпускнікоў чакаюць новыя вяршыні і адкрыцці. А дасягнуць пастаўленых мэт ім дапамогуць веды і ўменні, набытыя ў сценах Купалаўскага ўніверсітэта. У добры шлях, выпускнікі!
Гродзенскі дзяржаўны ўніверсітэт імя Янкі Купалы