Яшчэ 24 спецыялісты папоўнілі міжнародную супольнасць выпускнікоў ГрДУ імя Янкі Купалы. На педагагічным факультэце адбылося ўрачыстае ўручэнне дыпломаў выпускнікам магістратуры з КНР, якія вучыліся па профілі «Адукацыйны менеджмент».
Цяперашні курс увайшоў у гісторыю факультэта сваім уражлівым вынікам: больш за палову групы - 15 чалавек - скончылі магістратуру з адзнакай.
Свае пажаданні выпускнікам адрасаваў дэкан педагагічнага факультэта Юрый Гняздоўскі:
– Найперш хачу ад усёй душы павіншаваць вас з паспяховым заканчэннем Гродзенскага дзяржаўнага ўніверсітэта імя Янкі Купалы! Спадзяюся, час, праведзены на педагагічным факультэце, застанецца ў вашай памяці як перыяд яркіх адкрыццяў і самых цёплых успамінаў. Наша прафесарска-выкладчыцкая каманда старалася перадаць вам лепшы досвед, каб вы авалодалі важнымі прафесійнымі кампетэнцыямі. Цягам гэтага года вы не толькі вучыліся, але і знаёміліся з культурай і традыцыямі Беларусі. Няхай веды, здабытыя ў сценах універсітэта, стануць надзейнай падмогай у вашай будучай кар'еры!
Асабліва кранальным момантам стаў зварот дацэнта кафедры педагогікі і сацыяльнай работы Наталлі Міхайлавай, якая павіншавала выпускнікоў на іх роднай кітайскай мове:
– Дарагія сябры, калегі, выпускнікі! Сёння асаблівы і вельмі хвалюючы дзень. Яшчэ ўчора вы былі студэнтамі, а сёння – дыпламаваныя магістры. Мы шчыра ганарымся вашымі поспехамі і верым, што на працягу гэтага года вы адчувалі наш клопат і падтрымку. Мы бачылі, як старанна вы працавалі, і ведаем, што гэты шлях быў няпростым, але вы з гонарам яго прайшлі. Народная мудрасць абвяшчае: пасля любога дажджу заўсёды выходзіць сонца. Жадаю вам спадарожнага ветру ва ўсіх пачынаннях, каб любыя задачы вырашаліся лёгка і ўпэўнена. Адважвайцеся, імкніцеся да новых вяршыняў і смела ідзіце наперад!
Пасля кранальнай цырымоніі ўручэння дыпломаў слова ў адказ узялі самі выпускнікі. Сваімі шчырымі ўражаннямі ад жыцця ў Беларусі і глыбокай удзячнасцю выкладчыкам падзялілася Чжаа Ілінь:
– Я ўсім сэрцам пакахала гэтую краіну і цудоўны Гродна. Вельмі спадзяюся, што ўсё больш кітайскіх студэнтаў будуць прыязджаць сюды на вучобу, а беларускія рабятызмогуць адчыняць для сябе Кітай. Жадаю выказаць велізарную падзяку выкладчыкам нашага факультэта. Усе яны – неверагодна чулыя і натхняльныя жанчыны. Яны перадалі нам не толькі каштоўныя веды, але і на ўласным прыкладзе паказалі, наколькі паспяховымі, моцнымі і абаяльнымі могуць быць жанчыны ў сваёй прафесіі. Ад усёй душы жадаю кожнаму з вас шчасця, здароўя і ўдачы! Веру, што супрацоўніцтва і культурныя сувязі паміж Кітаем і Беларуссю ў сферы адукацыі будуць толькі мацнець.
Наперадзе ў маладых спецыялістаў вяртанне на радзіму і старт кар'еры ў новым статусе. Упэўненасць ва ўласных сілах ім падарыў вопыт, здабыты ў сценах Купалаўскага ўніверсітэта, і падтрымка настаўнікаў, якія прайшлі разам са студэнтамі гэты насычаны, часам няпросты, але бясконца шчаслівы шлях.
Гродзенскі дзяржаўны ўніверсітэт імя Янкі Купалы