З 11 па 13 снежня праходзіць Сумесная міжнародная міжвузаўская навукова-практычная канферэнцыя маладых вучоных і студэнтаў «Ад нацыянальнай да глабальнай бяспекі: шматфактарны аналіз выклікаў і пагроз стабільнаму развіццю Цэнтральнай Азіі». У навуковым мерапрыемстве ў анлайн-фармаце прынялі ўдзел купалаўцы.
Студэнты 3 курса факультэта гісторыі, камунікацыі і турызму ГрДУ імя Янкі Купалы Дзмітрый Чыкірыс і Андрэй Юдзенка пад навуковым кіраўніцтвам прафесара кафедры ўсеагульнай і славянскай гісторыі Тадэвуша Кручкоўскага прынялі анлайн-удзел у канферэнцыі, якая праходзіла на базе Кыргызска-Расійскага Славянскага ўніверсітэта імя Б.М. Ельцына. Каардынавала сустрэчу загадчык кафедры ўсеагульнай і славянскай гісторыі Юлія Ярмак.
Выступленні студэнтаў былі прысвечаны стратэгічнаму партнёру Рэспублікі Беларусь і КНР. Дзмітрый Чыкірыс і Андрэй Юдэнка прадставілі сваё бачанне кітайскага фактара ў геапалітыцы Цэнтральнай Азіі на працягу 10-х і 20-х гадоў XXI стагоддзя. Абазначылі вузлавыя пытанні ва ўзаемаадносінах КНР з дзяржавамі Цэнтральнай Азіі: эканамічнае супрацоўніцтва, інвестыцыйныя праекты і ўплыў кітайскай палітыкі на рэгіянальную бяспеку, існуючыя пагрозы.
Таксама ў якасці слухачоў у тэлемосце прынялі ўдзел студэнты 1 курса спецыяльнасці «Гісторыя» з Туркменістана. На думку Юліі Ярмак, уцягванне студэнтаў-замежнікаў у такія навуковыя дыскусіі мае вялікае значэнне. Гэта не толькі падвышае іх матывацыю да вучобы і даследчай дзейнасці, але і пашырае іх кругагляд, дазваляючы лепш зразумець міжнародныя адносіны і геапалітычныя працэсы. Акрамя таго ўдзел у такіх канферэнцыях садзейнічае інтэграцыі замежных студэнтаў у беларускую студэнцкую навуковую супольнасць. Гэта стварае платформу для абмену досведам, ведаў і культур, спрыяе ўзаемнаму інтэлектуальнаму ўзбагачэнню.
Ва ўмовах павелічэння ўзаемазалежнасці краін, падобныя студэнцкія мерапрыемствы становяцца ўсё больш актуальнымі, бо яны аказваюць станоўчы ўплыў на фармаванне новых падыходаў да рашэння агульных праблем.
Гродзенскі дзяржаўны ўніверсітэт імя Янкі Купалы