Сёння, 5 лістапада, у Воранаўскім раённым цэнтры культуры і народнай творчасці прайшоў літаратурна-краязнаўчы форум "Воранаўскія чытанні", які сабраў краязнаўцаў, педагогаў, аматараў пісьменства і ўсіх, хто цікавіцца гісторыяй малой радзімы жыхароў раёна. Асаблівы ўклад у работу форуму ўнеслі выкладчыкі Гродзенскага дзяржаўнага ўніверсітэта імя Янкі Купалы.
Адкрыццё форуму пачалося з наведвання тэматычнай выставы “Мая Воранаўшчына”, на якой былі прадстаўлены ўнікальныя экспанаты, якія адлюстроўваюць багатую гісторыю і культуру Воранаўскага раёна. Акрамя таго, адбылася прэзентацыя зборніка матэрыялаў па выніках І літаратурна-краязнаўчага форуму "Воранаўскія чытанні-2023", што падкрэслівае значнасць і развіццё краязнаўчага руху ў рэгіёне.
Ключавой падзеяй форуму стала пленарнае пасяджэнне, якое адкрылася выступленнем старшыні Саюза пісьменнікаў Беларусі, краязнаўцы і журналіста Аляксандра Карлюкевіча. Значны ўклад у работу пасяджэння ўнеслі супрацоўнікі Купалаўскага ўніверсітэта. З дакладам “Літаратурная і фальклорная Воранаўшчына – сапраўдныя складнікі краязнаўства” выступіла Аліна Сабуць, кандыдат філалагічных навук, дацэнт кафедры беларускай філалогіі. У сваім выступленні Аліна Эдмундаўна раскрыла багатую культурную спадчыну рэгіёну. Кандыдат гістарычных навук, дацэнт кафедры турызму і культурнай спадчыны Віталь Карнялюк выступіў з дакладам па тэме «Гісторыка-культурны патэнцыял Воранаўшчыны і перспектывы развіцця адукацыйнага турызму». Сяргей Амелька, кандыдат гістарычных навук, загадчык кафедры гісторыі Беларусі, археалогіі і спецыяльных гістарычных дысцыплін, прадставіў даклад "Да пытання аб паходжанні шляхты Лідскага павета". Кандыдат гістарычных навук, намеснік дэкана факультэта гісторыі, камунікацыі і турызму Андрэй Гецэвіч выступіў з даследаваннем «Крывавыя сляды пастакоўскіх фармаванняў на тэрыторыі Воранаўскага раёна».
Акрамя таго, быў зачытаны прывітальны ліст для ўсіх удзельнікаў і арганізатараў літаратурна-краязнаўчага форуму “Воранаўскія чытанні” ад рэктара Гродзенскага дзяржаўнага ўніверсітэта імя Янкі Купалы Ірыны Кітуркі, у якім адзначалася значнасць дадзенага мерапрыемства ў выхаванні патрыётаў сваёй краіны і прагучалі шчырыя пажаданні плённай працы, плённай працы.
Праца форума працягнулася ў пяці секцыях, якія праходзілі ў Воранаўскай сярэдняй школе. Навучэнцы прадставілі на суд журы свае даследчыя працы, дэманструючы цікавасць да гісторыі і культуры роднага краю.
Воранаўская раённая бібліятэка стала пляцоўкай для дыялогавай дыскусіі “Літаратура і краязнаўства – чыннікі нацыянальнага адзінства і патрыятызму”, мадэратарам якой стаў старшыня Саюза пісьменнікаў Беларусі Аляксандр Карлюкевіч.
У ліку ганаровых гасцей мерапрыемства - кандыдат філалагічных навук, дацэнт кафедры беларускай філалогіі Руслан Казлоўскі і прадстаўнікі Ніжагародскай вобласці Расійскай Федэрацыі, што надало форуму міжнародны статус.
Урачыстае закрыццё форуму адбылося ў Воранаўскім раённым цэнтры культуры і народнай творчасці. Мерапрыемства стала яшчэ адным важным крокам ва ўмацаванні супрацоўніцтва паміж Купалаўскім універсітэтам і Воранаўскім раёнам, садзейнічаючы развіццю навукі, культуры і адукацыі ў нашай краіне.
Гродзенскі дзяржаўны ўніверсітэт імя Янкі Купалы