9 кастрычніка ваенны факультэт сабраў 12 каманд, якія складаюцца з супрацоўнікаў Купалаўскага ўніверсітэта, для ўдзелу ў ваенна-патрыятычным злёце.
З прывітальным словам да ўдзельнікаў мерапрыемства звярнулася прарэктар па навуковай рабоце Наталля Башун. У сваёй прамове яна адзначыла важнасць правядзення ваенна-патрыятычных мерапрыемстваў не толькі сярод студэнтаў, але і супрацоўнікаў. Наталля Зігмундаўна пажадала камандам яркіх уражанняў і ўпэўненых перамог.
Падкрэсліў важнасць выхавання патрыётаў сваёй краіны і расказаў аб праграме мерапрыемства начальнік ваеннага факультэта Генадзь Песляк.
Далей купалаўцам неабходна было прайсці пяць выпрабаванняў. У конкурсе «Зброевы майстар» удзельнікі дэманстравалі навыкі валодання аўтаматам АК-74. Дакладнасць стральбы з пісталета Макарава правяралася ў спаборніцтве «Цёпкі стрэлак». «Тактычная стральба» дазволіла адпрацаваць навыкі паражэння цэляў з аўтамата АК-74 на інтэрактыўным трэнажоры. У конкурсе «Накат» удзельнікі спаборнічалі ў трапнасці стральбы з пнеўматычнага пісталета, выкарыстоўваючы хованкі. Самым сучасным і відовішчным стаў конкурс «Баявое пілатаванне БПЛА», дзе супрацоўнікі універсітэта змаглі адчуць сябе пілотамі Дронов.
Ваенна-патрыятычны злёт «Сіла ў адзінстве» стаў яркай і запамінальнай падзеяй, якая садзейнічае ўмацаванню карпаратыўнага духу, развіццю ваенна-прыкладных навыкаў і фарміраванню пачуцця патрыятызму сярод супрацоўнікаў Гродзенскага дзяржаўнага ўніверсітэта імя Янкі Купалы.
Гродзенскі дзяржаўны ўніверсітэт імя Янкі Купалы