17 верасня, у Дзень народнага адзінства, выкладчыкі, работнікі і студэнты Гродзенскага дзяржаўнага ўніверсітэта імя Янкі Купалы на чале з першым прарэктарам Аляксандрам Карэўскім далучыліся да Рэспубліканскай дыктоўкі ў гонар Дня народнага адзінства.
Пяты год падрад дыктоўка аб'яднала прадстаўнікоў розных прафесій і ўзростаў, каб разам адсвяткаваць і ўзгадаць, наколькі важна заставацца адзінымі.
– У 1939 годзе дзякуючы волі народа адбылася гістарычная справядлівасць, і беларускі народ стаў адзінай сям'ёй. Цяпер мы разумеем, наколькі важна шанаваць паразуменне, традыцыі, а таксама разам вырашаць усе задачы, якія перад намі стаяць, – адзначыў Аляксандр Карэўскі.
Удзельнікі дыктоўкі напісалі тэкст, прысвечаны гістарычнаму шляху нашай краіны, яе культурнай спадчыне і падзеям, звязаным з уз'яднаннем беларускага народа. Для купалаўцаў удзел у Рэспубліканскай дыктоўцы стаў нагодай звярнуцца да важных старонак айчыннай гісторыі.
Рэспубліканская дыктоўка традыцыйна праходзіць у рамках мерапрыемстваў, прымеркаваных да Дня народнага адзінства. Яго правядзенне аб'ядноўвае тысячы беларусаў па ўсёй краіне і становіцца магчымасцю яшчэ раз звярнуцца да гісторыі, узгадаць значныя падзеі і адчуць сваё дачыненне да агульнага мінулага і сучаснасці Беларусі.
Купалаўскі ўніверсітэт працягвае падтрымліваць ініцыятывы, накіраваныя на захаванне гістарычнай памяці, развіццё грамадзянскай адказнасці і ўмацаванне традыцый адзінства.
Гродзенскі дзяржаўны ўніверсітэт імя Янкі Купалы